Tuhun leitung thupiangte leh Lai Siangtho hong genkholh thute i lungngaih khop ciangin i ngaklah mahmah i Topa Jesuh hong paikikna ding hun nai mahmahta ahihna kilang mahmah hi. Hun nunung tawh kisai LST thusinna ah Eschatology kici-a, tua thu atom in khen thum in kikum hileng;

1. Mihingte gamtat kilamdanna:

1.1. Gitlohna hong khang semsem cih pen (Mt 24:12)

Tuhun i gam i lei, i kim i kiangah thupiangte leh Leitungbup a thupiangte i lungngahkhop ciangin leitung ah siatna nasia mahmahta cih ding lohngal omlo hi. Hibang siatna a piangsak bang hiam? Cih Lai Siangtho tungtawn in en hile hang; 2Tim 3;2-5, “tuahun ciangin mite in amau angsung ding bek ngaihsunin, huaihamin,kisialin, kihisakin, mi zahko-in,nu le pate’ thu mangloin,lungdam theihna mel nei loin, biakna lungsim nei loin,mi khual loin,hehpihna nei loin,mi gensia-in, ngongtatin, kihtakhuai-in,thuhoih deih loin, ciampelin, thu khual loin ,kiphasak gawpin,Pasian don loin pumpi nopsakna bek deihin,biakna thu a puathamteng zui napi-in biakna hangin vangliatna thu a omte deihlo ding uh hi. Tua bangin a gamta mite na pelh in.”

1.2. Kamsang manlo, Sia manlo om ding 2Peter 2:1, “kamsang man lote sia manlote om ding, cih na gen hi. Pasian omlo (Atheism) hi cih upna zong hong pung semsemta ahih manin Nitawp ni hun a mihingte gamtat leh pianzia ding kimuthei hi.

1.3. Topa Jesuh kineih tampi om ding

Mtt 24;5na sungah Topa Jesuh kineih mitampi hong om ding hi cih thu ngenkhol hi. Tuhun ciangin Topa Jesuh kineih mitampi omta a, mi pawlkhat in um in zuilai uh hi. Kum zalom 18 sungah Ann Lee pen Jesuh Numei hong thokik kineih in nungzui tampi nei hi. Kum zalom 19 sungah Jesuh kineih mi 7 bangin Kum zalom 20 sungah mi 21 bang om a, kum zalom 21 sungah bel Mi 4 khawng omkhin hi. Tuate sung ah aminthang pha diak pen Barazil gammi Inri Cristo hi-in anungzui leh amah abia zong mi honkhat om hi.

2. Hong piang thei zelding thute:

2.1. Gal kidona

Nitawp ni hong nai ciang mihing ten i tuah thupiang dingte in, gam khat leh gam khat ,Kumpi khat leh khat kido ding ,mun tuamtuam ah kialpi hong tung ding , zin hong ling ding cihte pen Mtt 24:7-na ah kimu thei hi. Gal kidona pen tangthu hitaleh tulaitak thu hita leh i zaktam pen leh i theih tampi hikha ding hi. Tangtawng pekpan gal na kido uh a, tu hun ciang nasia semsem hi. Mtt 24;6-7na sungah ki do nasia takin hong tun ding thu na gen hi. Minam khatlekhat kikal buaina, gam khat leh gam khat, kikap kithah nate thuthang (News) tuamtuam pan in nisim in kiza den hi. Abeisa Kum zalom(centuries) sung gal kidonate enkik hile hang, kumzalom 15 sungah 29vei om in, kum zalom 16 sungah 59 vei, kum zalom 17 sungah 75vei, kum zalom 18 sungah 69vei, kum zalom 19 sungah 294vei, kum zalom 20 sungah 278vei, kum zalom 21 sungah 55vei sang tamzaw omin gal kidona khang semsem hi.

2.2. Kialpi tung ding

Kial i cih pen gambuai in a puak van khat cileng kikhial lo ding hi. Khua hun kilaih, kikhelna pan zong piangthei hi. Leitung mun tuamtuam ah kumsim phial in piang hi. Nitawp ni ciangin Kial hong tunna ding thu Mtt 24;7-na ah kimu thei hi. Kumzalom 15 sungin 6ve piang hi. Kum zalom 16 sungin10vei, kum zalom 17 sungin 24vei, kum zalom 18 sungin 28vei, kum zalo 19 sungin 30vei, kum zalom 20 sungin 44vei leitungah kialpi tungin, kiamlo in khang semsem zaw hi.Kialpi 1921-1947 sungin Rusia, Sen, Ukraine, Kazakhstan, Soviet union gamte ah 7vei tunga, annek ding neilo in million 18.8 pan 26.5 ciang dong misi om hi kici hi. 1955-1961 sung Kialpi (Great famine) hangin Sen gamah misi million 36 pha ding kici hi.

2.3. Zinlinna

Leitung ah tamveipi zinling khin hi. Century in a ciapteh na-ah 7.0 magnitude sang hatzaw zinling pen anaui a bangin kimu thei hi. Kum zalom 15 sungah 2vei lingin kum zalom16 sungah 3vei, kum zalom 17 sungah 7vei kum zalom 18 sungah 13vei, kum zalom 19 sungah 29vei, kum zalom 20 sungah 123vei, kum zalom 21 sung leh tuni ciang 124 sang tamzaw zinling hi. Kum zalom dangte sang kumzalom 21 sungah zinlingna tamzaw tham hi.

3. Leitungah kilamdanna om ding:

Israel minamte pen Hitler hundong kumtampi saltang uh hi. Hunkhat lai in kumpi nei uh himahtase leh Israel gam pen buaina kipatna phualpi hidianga, akim apam leh leitung bup lawh ding hi. Zechariah 12na sungah Israel gam pen akim apam pan gam tuamtuamte kipawl in do ding uh ahihna nagenkhola tuhun Israelte dinmun tawh kituak mahmah hi.

Daniel 12:4na sung ah hun nunung Topa Jesuh hong pai ding hong naiciangin Leitung ah pilna siamnate nakpitak hong khang ding ahihna na genkhol khin hi. Leitung ah pilna siamna hong khantohna tampi hong kilamdang sak in, khualzin gamvakna, nuntak zonna, nuntak khuasakna tampi hong kilamsak hi. Tua mah bangin galvan hoih tuamtuam tampi hong kibawl in gal kidona dong hong khansak hi. Gog leh Magog thu, kumpi khat leh khat, gam khat leh gam khat kido ding pen Lai Siangtho adiak in Ezekiel leh Mangmuhna sung ah na limgen in Koran (muslim LST) sungah zong kigelh hi.

Lai Siangtho sung a kigelh gam minte leh tuhun a gam minte kilawhna a kibatlo hangin amun amual (Location) kituak mahmah hi. Ezekeil 38na sunga Meshek minmate leh Tubal minamte pen Rasia-te hi uh a, Persia gam pen Iran hi-in, Kush gam pen Ethiopia, Put gam pen Libya, Gomer gam pen Turkey, Bethtograman gam pen Armenia pau azang Asia leh middle east a gam pawlkhatte ahi uh hi. Tuate ban ah leitung gam tuamtuamte kipawlna neikhin uh ah, thuneihna khat nuai ah omnailo deuh bek ahi hi.

Atunga i gente pen Lai Siangtho in nausuak ding a kihing(asuak khia nailo deuh) banga agen, Topa Jesuh hong pai ding nai mahmahta ahihna hong kilangsakte ahi hi. Topa Jesuh hong paikik ding hun anai ciangin apiang thu Laisiangtho in agente piangpiangta ahilam kiphawksak nuam i hi hi. Tua ahih manin hun nunung hita ahihlam phawk a kigingkhol ciat dingin Topa in thupha hong piata hen, Amen.